|
Incipit
V.
Domine labia +
mea aperies.
R.
Et os meum annuntiabit laudem tuam.
V.
Deus +
in adjutorium meum
intende.
R.
Domine, ad adjuvandum me festina.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Alleluia
Invitatorium
{Antiphona ex Proprio Sanctorum}
Ant.
Immaculatam Conceptionem Virginis Mariae celebremus: * Christum
ejus Filium adoremus Dominum.
Ant.
Immaculatam Conceptionem Virginis Mariae celebremus: * Christum
ejus Filium adoremus Dominum.
Venite,
exsultemus Domino, jubilemus Deo, salutari nostro: praeoccupemus
faciem ejus in confessione, et in psalmis jubilemus ei.
Ant.
Immaculatam Conceptionem Virginis Mariae celebremus: * Christum
ejus Filium adoremus Dominum.
Quoniam
Deus magnus Dominus, et Rex magnus super omnes deos, quoniam non
repellet Dominus plebem suam: quia in manu ejus sunt omnes fines
terrae, et altitudines montium ipse conspicit.
Ant.
Christum ejus Filium adoremus Dominum.
Quoniam
ipsius est mare, et ipse fecit illud, et aridam fundaverunt
manus ejus venite, adoremus, et procidamus ante Deum: ploremus
coram Domino, qui fecit nos, quia ipse est Dominus, Deus noster;
nos autem populus ejus, et oves pascuae ejus.
Ant.
Immaculatam Conceptionem Virginis Mariae celebremus: * Christum
ejus Filium adoremus Dominum.
Hodie,
si vocem ejus audieritis, nolite obdurare corda vestra, sicut in
exacerbatione secundum diem tentationis in deserto: ubi
tentaverunt me patres vestri, probaverunt et viderunt opera mea.
Ant.
Christum ejus Filium adoremus Dominum.
Quadraginta
annis proximus fui generationi huic, et dixi; Semper hi errant
corde, ipsi vero non cognoverunt vias meas: quibus juravi in ira
mea; Si introibunt in requiem meam.
Ant.
Immaculatam Conceptionem Virginis Mariae celebremus: * Christum
ejus Filium adoremus Dominum.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Christum ejus Filium adoremus Dominum.
Ant.
Immaculatam Conceptionem Virginis Mariae celebremus: * Christum
ejus Filium adoremus Dominum.
Hymnus
{ex Proprio Sanctorum}
Praeclara
custos virginum,
Intacta mater Numinis,
Coelestis aulae janua,
Spes nostra, coeli gaudium.
Inter rubeta lilium,
Columba formosissima,
Virga e radice germinans
Nostro medelam vulneri.
Turris draconi impervia,
Amica stella naufragis,
Tuere nos a fraudibus,
Tuaque luce dirige.
Erroris umbras
discute,
Syrtes dolosas amove,
Fluctus tot inter, deviis
Tutam reclude semitam.
Jesu, tibi sit gloria,
Qui natus es de Virgine,
Cum Patre, et almo Spiritu
In sempiterna saecula.
Amen.
Psalmi cum lectionibus
{Antiphonas et Psalmi ex Proprio Sanctorum}
Nocturn I.
Ant.
Admirabile est nomen tuum *
Domine in universa terra, quia in Virgine Maria dignum tibi
habitaculum praeparasti
Psalmus 8
[1]
8:1
Dómine, Dóminus noster, * quam admirábile est nomen tuum in
univérsa terra!
8:2
Quóniam eleváta est magnificéntia tua, * super cælos.
8:3
Ex ore infántium et lacténtium perfecísti laudem propter
inimícos tuos, * ut déstruas inimícum et ultórem.
8:4
Quóniam vidébo cælos tuos, ópera digitórum tuórum: * lunam et
stellas, quæ tu fundásti.
8:5
Quid est homo quod memor es ejus? * aut fílius hóminis, quóniam
vísitas eum?
8:6
Minuísti eum paulo minus ab Ángelis, glória et honóre coronásti
eum: * et constituísti eum super ópera mánuum tuárum.
8:7
Omnia subjecísti sub pédibus ejus, * oves et boves univérsas:
ínsuper et pécora campi.
8:8
Vólucres cæli, et pisces maris, * qui perámbulant sémitas maris.
8:9
Dómine, Dóminus noster, * quam admirábile est nomen tuum in
univérsa terra!
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Admirabile est nomen tuum * Domine in universa terra, quia in
Virgine Maria dignum tibi habitaculum praeparasti
Ant.
In sole * posuit Deus tabernaculum suum
Psalmus 18
[2]
18:1
Cæli enárrant glóriam Dei: * et ópera mánuum ejus annúntiat
firmaméntum.
18:2
Dies diéi erúctat verbum, * et nox nocti índicat sciéntiam.
18:3
Non sunt loquélæ, neque sermónes, * quorum non audiántur voces
eórum.
18:4
In omnem terram exívit sonus eórum: * et in fines orbis terræ
verba eórum.
18:5
In sole pósuit tabernáculum suum: * et ipse tamquam sponsus
procédens de thálamo suo:
18:6
Exsultávit ut gigas ad curréndam viam, * a summo cælo egréssio
ejus:
18:7
Et occúrsus ejus usque ad summum ejus: * nec est qui se
abscóndat a calóre ejus.
18:8
Lex Dómini immaculáta, convértens ánimas: * testimónium Dómini
fidéle, sapiéntiam præstans párvulis.
18:9
Justítiæ Dómini rectæ, lætificántes corda: * præcéptum Dómini
lúcidum; illúminans óculos.
18:10
Timor Dómini sanctus, pérmanens in sæculum sæculi: * judícia
Dómini vera, justificáta in semetípsa.
18:11
Desiderabília super aurum et lápidem pretiósum multum: * et
dulcióra super mel et favum.
18:12
Étenim servus tuus custódit ea, * in custodiéndis illis
retribútio multa.
18:13
Delícta quis intélligit? ab occúltis meis munda me: * et ab
aliénis parce servo tuo.
18:14
Si mei non fúerint domináti, tunc immaculátus ero: * et
emundábor a delícto máximo.
18:15
Et erunt ut compláceant elóquia oris mei: * et meditátio cordis
mei in conspéctu tuo semper.
18:15
Dómine, adjútor meus, * et redémptor meus.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
In sole * posuit Deus tabernaculum suum
Ant. In
Conceptione sua * accepit Maria benedictionem a Domino, et
misericordiam a Deo salutari suo
Psalmus 23
[3]
23:1
Dómini est terra, et plenitúdo ejus: * orbis terrárum, et
univérsi qui hábitant in eo.
23:2
Quia ipse super mária fundávit eum: * et super flúmina
præparávit eum.
23:3
Quis ascéndet in montem Dómini? * aut quis stabit in loco sancto
ejus?
23:4
Ínnocens mánibus et mundo corde, * qui non accépit in vano
ánimam suam, nec jurávit in dolo próximo suo.
23:5
Hic accípiet benedictiónem a Dómino: * et misericórdiam a Deo,
salutári suo.
23:6
Hæc est generátio quæréntium eum, * quæréntium fáciem Dei Jacob.
23:7
Attóllite portas, príncipes, vestras, et elevámini, portæ
æternáles: * et introíbit Rex glóriæ.
23:8
Quis est iste Rex glóriæ? * Dóminus fortis et potens: Dóminus
potens in prælio.
23:9
Attóllite portas, príncipes, vestras, et elevámini, portæ
æternáles: * et introíbit Rex glóriæ.
23:10
Quis est iste Rex glóriæ? * Dóminus virtútum ipse est Rex
glóriæ.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
In Conceptione sua * accepit Maria benedictionem a Domino, et
misericordiam a Deo salutari suo
V.
Deus omnipotens praecinxit me virtute.
R.
Et posuit immaculatam viam meam.
Pater
noster, qui es in caelis, Sanctificetur nomen tuum. Adveniat
regnum tuum. Fiat voluntas tua,
sicut in coelo et in terra.
Panem nostrum quotidianum da nobis hodie. Et dimitte nobis
debita nostra, sicut et nos dimittimus debitoribus nostris.
V.
Et ne nos inducas in tentationem:
R.
Sed libera nos a malo.
Absolutio.
Exaudi, Domine Jesu Christe, preces servorum tuorum, et miserere nobis:
Qui cum Patre et Spiritu Sancto vivis et regnas in saecula
saeculorum. Amen.
V.
Jube domne benedicere.
Benedictio.
Benedictione
perpetua benedicat nos Pater aeternus. Amen.
Lectio 1
Gen 3:1-5
1
Sed et serpens erat callidior cunctis animantibus terrae quae
fecerat Dominus Deus. Qui dixit
ad mulierem: Cur praecepit vobis Deus ut non comederetis de omni
ligno paradisi?
2
Cui respondit mulier: De fructu lignorum, quae sunt in paradiso,
vescimur:
3
De fructu vero ligni quod est in medio paradisi, praecepit nobis
Deus ne comederemus, et ne tangeremus illud, ne forte moriamur.
4
Dixit autem serpens ad mulierem: Nequaquam morte moriemini.
5
Scit enim Deus quod in quocumque die comederitis ex eo,
aperientur oculi vestri, et eritis sicut dii, scientes bonum et
malum.
V.
Tu autem Domine miserere nobis.
R.
Deo gratias
R.
Per unum hominem peccatum in hunc mundum intravit, in quo omnes
peccaverunt.
* Ne timeas Maria, invenisti gratiam apud Deum,
V.
Eripuit Dominus animam tuam de morte, et contra inimicum factus
est protector tuus.
R.
Ne timeas Maria, invenisti gratiam apud Deum,
V.
Jube domne benedicere.
Benedictio.
Unigenitus
Dei Filius nos benedicere et adjuvare dignetur. Amen
Lectio 2
Gen 3:6-8
6
Vidit igitur mulier quod bonum esset lignum ad vescendum, et
pulchrum oculis, aspectuque delectabile: et tulit de fructu
illius, et comedit: deditque viro suo, qui comedit.
7
Et aperti sunt oculi amborum; cumque cognovissent se esse nudos,
consuerunt folia ficus, et fecerunt sibi perizomata.
8
Et cum audissent vocem Domini Dei deambulantis in paradiso ad
auram post meridiem, abscondit se Adam et uxor ejus a facie
Domini Dei in medio ligni paradisi.
V.
Tu autem Domine miserere nobis.
R.
Deo gratias
R.
Transite ad me omnes qui concupiscitis me:
* Et narrabo vobis quanta fecit Deus animae meae.
V.
Vivit Dominus, quoniam adimplevit in me misericordiam suam.
R.
Et narrabo vobis quanta fecit Deus animae meae.
V.
Jube domne benedicere.
Benedictio.
Spiritus Sancti gratia illuminet
sensus et corda nostra. Amen.
Lectio 3
Gen 3:9-15
9
Vocavitque Dominus Deus Adam, et dixit ei: Ubi es?
10
Qui ait: Vocem tuam audivi in paradiso, et timui, eo quod nudus
essem, et abscondi me.
11
Cui dixit: Quis enim indicavit tibi quod nudus esses, nisi quod
ex ligno de quo praeceperam tibi ne comederes, comedisti?
12
Dixitque Adam: Mulier, quam dedisti mihi sociam, dedit mihi de
ligno, et comedi.
13
Et dixit Dominus Deus ad mulierem: Quare hoc fecisti? Quae
respondit: Serpens decepit me, et comedi.
14
Et ait Dominus Deus ad serpentem: Quia fecisti hoc, maledictus
es inter omnia animantia, et bestias terrae: super pectus tuum
gradieris, et terram comedes cunctis diebus vitae tuae.
15
Inimicitias ponam inter te et mulierem, et semen tuum et semen
illius: ipsa conteret caput tuum, et tu insidiaberis calcaneo
ejus.
V.
Tu autem Domine miserere nobis.
R.
Deo gratias
R.
Electa mea candida sicut nix in Libano; sicut favus distillans
labia ejus:
* Mel et lac sub lingua illius.
V.
Veni de Libano, sponsa mea, veni coronaberis corona gratiarum.
R.
Mel et lac sub lingua illius.
V.
Glória Patri, et Fílio, * et Spirítui Sancto.
R.
Mel et lac sub lingua illius.
Nocturn II.
Ant.
Diffusa est gratia * in Conceptione ejus, et speciosa apparuit
inter filias hominum
Psalmus 44
[4]
44:1
Eructávit cor meum verbum bonum: * dico ego ópera mea Regi
44:2
Lingua mea cálamus scribæ: * velóciter scribéntis.
44:3
Speciósus forma præ fíliis hóminum, diffúsa est grátia in lábiis
tuis: * proptérea benedíxit te Deus in ætérnum.
44:4
Accíngere gládio tuo super femur tuum, * potentíssime.
44:5
Spécie tua et pulchritúdine tua: * inténde, próspere procéde, et
regna.
44:6
Propter veritátem, et mansuetúdinem, et justítiam: * et dedúcet
te mirabíliter déxtera tua.
44:7
Sagíttæ tuæ acútæ, pópuli sub te cadent: * in corde inimicórum
Regis.
44:8
Sedes tua, Deus, in sæculum sæculi: * virga directiónis virga
regni tui.
44:9
Dilexísti justítiam, et odísti iniquitátem: * proptérea unxit
te, Deus, Deus tuus, óleo lætítiæ præ consórtibus tuis.
44:10
Myrrha, et gutta, et cásia a vestiméntis tuis, a dómibus
ebúrneis: * ex quibus delectavérunt te fíliæ regum in honóre
tuo.
44:10
Ástitit regína a dextris tuis in vestítu deauráto: * circúmdata
varietáte.
44:11
Audi fília, et vide, et inclína aurem tuam: * et oblivíscere
populum tuum et domum patris tui.
44:12
Et concupíscet Rex decórem tuum: * quóniam ipse est Dóminus Deus
tuus, et adorábunt eum.
44:13
Et fíliæ Tyri in munéribus * vultum tuum deprecabúntur: omnes
dívites plebis.
44:14
Omnis glória ejus fíliæ Regis ab intus, * in fímbriis áureis
circumamícta varietátibus.
44:15
Adducéntur Regi vírgines post eam: * próximæ ejus afferéntur
tibi.
44:16
Afferéntur in lætítia et exsultatióne: * adducéntur in templum
Regis.
44:17
Pro pátribus tuis nati sunt tibi fílii: * constítues eos
príncipes super omnem terram.
44:18
Mémores erunt nóminis tui: * in omni generatióne et
generatiónem.
44:18
Proptérea pópuli confitebúntur tibi in ætérnum: * et in sæculum
sæculi.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Diffusa est gratia * in Conceptione ejus, et speciosa apparuit
inter filias hominum
Ant. Adjuvit
eam * Deus mane diluculo: sanctificavit tabernaculum suum
Altissimus
Psalmus 45
[5]
45:1
Deus noster refúgium, et virtus: * adjútor in tribulatiónibus,
quæ invenérunt nos nimis.
45:2
Proptérea non timébimus dum turbábitur terra: * et transferéntur
montes in cor maris.
45:3
Sonuérunt, et turbátæ sunt aquæ eórum: * conturbáti sunt montes
in fortitúdine ejus.
45:4
Flúminis ímpetus lætíficat civitátem Dei: * sanctificávit
tabernáculum suum Altíssimus.
45:5
Deus in médio ejus, non commovébitur: * adjuvábit eam Deus mane
dilúculo.
45:6
Conturbátæ sunt Gentes, et inclináta sunt regna: * dedit vocem
suam, mota est terra.
45:7
Dóminus virtútum nobíscum: * suscéptor noster Deus Jacob.
45:8
Veníte, et vidéte ópera Dómini, quæ pósuit prodígia super
terram: * áuferens bella usque ad finem terræ.
45:9
Arcum cónteret, et confrínget arma: * et scuta combúret igni.
45:10
Vacáte, et vidéte quóniam ego sum Deus: * exaltábor in Géntibus,
et exaltábor in terra.
45:11
Dóminus virtútum nobíscum: * suscéptor noster Deus Jacob.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Adjuvit eam * Deus mane diluculo: sanctificavit tabernaculum
suum Altissimus
Ant. Gloriosa
* dicta sunt de te, civitas Dei: fundavit te Dominus in montibus
sanctis
Psalmus 66
[6]
66:1
Deus, misereátur nostri, et benedícat nobis: * illúminet vultum
suum super nos, et misereátur nostri.
66:2
Ut cognoscámus in terra viam tuam, * in ómnibus géntibus
salutáre tuum.
66:3
Confiteántur tibi pópuli, Deus: * confiteántur tibi pópuli
omnes.
66:4
Læténtur et exsúltent gentes: * quóniam júdicas pópulos in
æquitáte, et gentes in terra dírigis.
66:5
Confiteántur tibi pópuli, Deus, confiteántur tibi pópuli omnes:
* terra dedit fructum suum.
66:6
Benedícat nos Deus, Deus noster, benedícat nos Deus: * et
métuant eum omnes fines terræ.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Gloriosa * dicta sunt de te, civitas Dei: fundavit te Dominus in
montibus sanctis
V.
In hoc cognovi quoniam voluisti me.
R.
Quoniam non gaudebit inimicus meus super me.
Pater
noster, qui es in caelis, Sanctificetur nomen tuum. Adveniat
regnum tuum. Fiat voluntas tua, sicut in coelo et in terra.
Panem nostrum quotidianum da nobis hodie. Et dimitte nobis
debita nostra, sicut et nos dimittimus debitoribus nostris.
V.
Et ne nos inducas in tentationem:
R.
Sed libera nos a malo.
Absolutio.
Ipsius pietas et misericordia nos adjuvet, qui cum Patre et Spiritu
Sancto vivit et regnat in saecula saeculorum.
Amen.
V.
Jube domne, benedicere.
Benedictio.
Deus Pater
omnipotens sit nobis propitius et clemens.
Amen.
Lectio 4
Sermo sancti Hieronymi Presbyteri.
De Assumptione B. M. V.
Qualis et quanta esset beata, et gloriosa semper Virgo Maria, ab
Angelo divinitus declaratur, cum dicitur: Ave gratia plena,
Dominus tecum: benedicta tu in mulieribus. Talibus namque
decebat Virginem oppignorari muneribus, ut esset gratia plena,
quae dedit coelis gloriam, terris Dominum, pacemque refudit,
fidem Gentibus, finem vitiis, vitae ordinem, moribus
disciplinam. Et bene plena, quia ceteris per partes praestatur:
Mariae vero simul se tota infudit plenitudo gratiae. Vere plena,
quia etsi in sanctis Patribus, et Prophetis gratia fuisse
creditur, non tamen eatenus plena: in Mariam vero totius
gratiae, quae in Christo est, plenitudo venit, quamquam aliter.
Et ideo inquit:
Benedicta tu in mulieribus: id est plus benedicta, quam omnes
mulieres. Ac per hoc quidquid maledictionis infusum est per
Hevam, totum abstulit benedictio Mariae.
De ipsa Salomon in Canticis, quasi in
laudem ejus: Veni, inquit, columba mea, immaculata mea. Jam enim
hiems transiit, imber abiit, et recessit. Ac deinde inquit: Veni
de Libano, veni, coronaberis.
V.
Tu autem Domine miserere nobis.
R.
Deo gratias
R.
Ego ex ore Altissimi prodivi, primogenita ante omnem creaturam:
ego feci in coelis ut oriretur lumen indeficiens.
* Nondum erant
abyssi, et ego jam concepta eram.
V.
Deus enim creavit me in justitia, et apprehendit manum meam, et
servavit me.
R.
Nondum erant abyssi, et ego jam concepta eram.
V.
Jube domne, benedicere.
Benedictio.
Christus perpetuae det nobis gaudia
vitae. Amen.
Lectio 5
Non immerito igitur venire de Libano jubetur, quia Libanus
candidatio interpretatur. Erat enim candidata multis meritorum
virtutibus, et dealbata nive candidior, Spiritus sancti
muneribus, simplicitatem columbae in omnibus repraesentans,
quoniam, quidquid in ea gestum est, totum puritas et
simplicitas, totum veritas et gratia fuit; totum misericordia et
justitia, quae de caelo prospexit: et ideo immaculata, quia in
nullo corrupta.
Circumdedit enim virum in utero, sicut Jeremias sanctus
testatur, et non aliunde accepit. Faciet, inquit, Dominus novum
super terram, et mulier circumdabit virum. Vere novum, et omnium
novitatum supereminens novitas virtutum, quando Deus (quem ferre
non potest mundus, neque videre aliquis, ut vivere possit) sic
ingressus est hospitium ventris, ut corporis claustrum nesciret:
sicque gestatus, ut totus Deus in eo esset: et sic exivit inde,
ut esset (sicut Ezechiel fatetur porta omnino clausa. Unde
canitur in eisdem Canticis de ea: Hortus conclusus, fons
signatus, emissiones tuae paradisus.
Vere hortus deliciarum, in quo consita
sunt universa florum genera, et odoramenta virtutum: sicque
conclusus, ut nesciat violari, neque corrumpi ullis insidiarum
fraudibus. Fons itaque signatus sigillo totius Trinitatis.
V.
Tu autem Domine miserere nobis.
R.
Deo gratias
R.
Nihil inquinatum in eam incurrit:
* Candor est lucis aeternae et speculum sine macula.
V.
Est enim haec speciosior sole, et luci comparata invenitur
purior.
R.
Candor est lucis aeternae et speculum sine macula.
V.
Jube domne, benedicere.
Benedictio.
Ignem sui
amoris accendat Deus in cordibus nostris. Amen.
Lectio 6
Ex Actis Pii
Papic IX.
Deiparae autem Virginis in sua Conceptione de teterrimo humani
generis hoste victoriam, quam divina eloquia, veneranda
traditio, perpetuus Ecclesiae sensus, singularis episcoporum ac
fidelium conspiratio, insignia quoque summorum Pontificum acta
atque constitutiones mirifice jam illustrabant, Pius nonus
Pontifex Maximus totius Ecclesiae votis annuens statuit supremo
suo atque infallibili oraculo solemniter proclamare.
Itaque sexto Idus Decembris anni
millesimi octingentesimi quinquagesimi quarti in basilica
Vaticana ingenti sanctae Romanae Ecclesiae patrum Cardinalium,
et Episcoporum ex dissitis etiam regionibus astante coetu,
universoque plaudente orbe solemniter pronuntiavit ac definivit:
Doctrinam quae tenet beatissimam Virginem Mariam in primo
instanti suae Conceptionis fuisse, singulari Dei privilegio, ab
omni originalis culpae labe praeservatam imunem, esse a Deo
revelatam, ac proinde ab omnibus fidelibus firmiter
constanterque credendam.
V.
Tu autem Domine miserere nobis.
R.
Deo gratias
R.
Signum magnum apparuit in coelo: Mulier amicta sole, et luna sub
pedibus ejus:
* Et in capite ejus corona stellarum duodecim.
V.
Induit eam Dominus vestimentis salutis, indumento justitiae, et
quasi sponsam ornavit eam monilibus suis.
R.
Et in capite ejus corona stellarum duodecim.
V.
Glória Patri, et Fílio, * et Spirítui Sancto.
R.
Et in capite ejus corona stellarum duodecim.
Nocturn III.
Ant.
Sanctimonia et magnificentia * in Conceptione ejus; anuntiate in
omnibus populis gloriam ejus
Psalmus 95
[7]
95:1
Cantáte Dómino cánticum novum: * cantáte Dómino, omnis terra.
95:2
Cantáte Dómino, et benedícite nómini ejus: * annuntiáte de die
in diem salutáre ejus.
95:3
Annuntiáte inter gentes glóriam ejus, * in ómnibus pópulis
mirabília ejus.
95:4
Quóniam magnus Dóminus, et laudábilis nimis: * terríbilis est
super omnes deos.
95:5
Quóniam omnes dii géntium dæmónia: * Dóminus autem cælos fecit.
95:6
Conféssio, et pulchritúdo in conspéctu ejus: * sanctimónia et
magnificéntia in sanctificatióne ejus.
95:7
Afférte Dómino, pátriæ géntium, afférte Dómino glóriam et
honórem: * afférte Dómino glóriam nómini ejus.
95:8
Tóllite hóstias, et introíte in átria ejus: * adoráte Dóminum in
átrio sancto ejus.
95:9
Commoveátur a fácie ejus univérsa terra: * dícite in géntibus
quia Dóminus regnávit.
95:10
Étenim corréxit orbem terræ qui non commovébitur: * judicábit
pópulos in æquitáte.
95:11
Læténtur cæli, et exsúltet terra: commoveátur mare, et plenitúdo
ejus: * gaudébunt campi, et ómnia quæ in eis sunt.
95:12
Tunc exsultábunt ómnia ligna silvárum a fácie Dómini, quia
venit: * quóniam venit judicáre terram.
95:13
Judicábit orbem terræ in æquitáte, * et pópulos in veritáte sua.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Sanctimonia et magnificentia * in Conceptione ejus; anuntiate in
omnibus populis gloriam ejus
Ant.
Laetamini omnes * in Domino: et confitemini memoriae sanctitatis
ejus
Psalmus 96
[8]
96:1
Dóminus regnávit, exsúltet terra: * læténtur ínsulæ multæ.
96:2
Nubes, et calígo in circúitu ejus: * justítia, et judícium
corréctio sedis ejus.
96:3
Ignis ante ípsum præcédet, * et inflammábit in circúitu inimícos
ejus.
96:4
Illuxérunt fúlgura ejus orbi terræ: * vidit, et commóta est
terra.
96:5
Montes, sicut cera fluxérunt a fácie Dómini: * a fácie Dómini
omnis terra.
96:6
Annuntiavérunt cæli justítiam ejus: * et vidérunt omnes pópuli
glóriam ejus.
96:7
Confundántur omnes, qui adórant sculptília: * et qui gloriántur
in simulácris suis.
96:8
Adoráte eum, omnes Ángeli ejus: * audívit, et lætáta est Sion.
96:9
Et exsultavérunt fíliæ Judæ, * propter judícia tua, Dómine:
96:10
Quóniam tu Dóminus Altíssimus super omnem terram: * nimis
exaltátus es super omnes deos.
96:11
Qui dilígitis Dóminum, odíte malum: * custódit Dóminus ánimas
sanctórum suórum, de manu peccatóris liberábit eos.
96:12
Lux orta est justo, * et rectis corde lætítia.
96:13
Lætámini, justi, in Dómino: * et confitémini memóriæ
sanctificatiónis ejus.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Laetamini omnes * in Domino: et confitemini memoriae sanctitatis
ejus
Ant. Notum
fecit * Dominus opus suum: in conspectu Gentium revelavit
gloriam Genitricis suae
Psalmus 97
[9]
97:1
Cantáte Dómino cánticum novum: * quia mirabília fecit.
97:2
Salvávit sibi déxtera ejus: * et bráchium sanctum ejus.
97:3
Notum fecit Dóminus salutáre suum: * in conspéctu géntium
revelávit justítiam suam.
97:4
Recordátus est misericórdiæ suæ, * et veritátis suæ dómui
Israël.
97:5
Vidérunt omnes términi terræ * salutáre Dei nostri.
97:6
Jubiláte Deo, omnis terra: * cantáte, et exsultáte, et psállite.
97:7
Psállite Dómino in cíthara, in cíthara et voce psalmi: * in
tubis ductílibus, et voce tubæ córneæ.
97:8
Jubiláte in conspéctu regis Dómini: * moveátur mare, et
plenitúdo ejus: orbis terrárum, et qui hábitant in eo.
97:9
Flúmina plaudent manu, simul montes exsultábunt a conspéctu
Dómini: * quóniam venit judicáre terram.
97:10
Judicábit orbem terrárum in justítia, * et pópulos in æquitáte.
V.
Glória Patri, et Fílio, * et Spirítui Sancto.
R.
Sicut erat in princípio, et nunc, et semper, * et in saecula
saeculórum. Amen
Ant.
Notum fecit * Dominus opus suum: in conspectu Gentium revelavit
gloriam Genitricis suae
V.
Exaltabo te Domine, quoniam suscepisti me.
R.
Nec delectasti inimicos meos super me.
Pater
noster, qui es in caelis, Sanctificetur nomen tuum. Adveniat
regnum tuum. Fiat voluntas tua,
sicut in coelo et in terra.
Panem nostrum quotidianum da nobis hodie. Et dimitte nobis
debita nostra, sicut et nos dimittimus debitoribus nostris.
V.
Et ne nos inducas in tentationem:
R.
Sed libera nos a malo.
Absolutio.
A vinculis peccatorum nostrorum absolvat nos omnipotens et misericors
Dominus. Amen.
V.
Jube domne benedicere.
Benedictio.
Evangelica
lectio sit nobis salus et protectio.
Amen.
Lectio 7
Lectio sancti Evangelii secundum Lucam.
Luke 1:26-28
In illo tempore: Missus est Angelus Gabriel a Deo in civitatem
Galilaeae, cui nomen Nazareth, ad Virginem desponsatam viro, cui
nomen erat Joseph, de domo David, et nomen Virginis Maria. Et
reliqua.
Homilia sancti Germani Episcopi.
In Praesentatione Deipara
Ave Maria, gratia plena, Sanctis sanctior, et coelis excelsior,
et Cherubim gloriosior, et Seraphim honorabilior, et super omnem
creaturam venerabilior. Ave columba, quae nobis et fructum fers
olivae, et servatorem a spiritali diluvio, ac portum salutis
animitias, cujus pennae deargentatae, et posteriora dorsi in
pallore auri sanctissimi et illuminantis Spiritus fulgore
irradiantur. Ave amoenissimus et rationalis Dei paradisus,
benevolentissima et omnipotenti eiusdem dextra hodie ad Orientem
plantatus, et ipsi suave olens lilium, et rosam immarcescibilem
germinans in eorum medelam, qui pestiferam animaeque exitialem
amaritudinem mortis ad Occidentem ebiberant: paradisus, in quo
ad veritatis agnitionem lignum vivificum efflorescit, e quo qui
gustaverint, immortalitatem consequuntur. Ave sacrosancte
aedificatum, imaculatum, purissimumque Dei summi Regis palatium,
eiusdem Dei Regis magnificentia circumornatum, omnesque hospitio
recipiens, ac mysticis reficiens deliciis; in quo non manufactus
et vario decore nitens situs est spiritualis sponsi thalamus; in
quo Verbum errantem humanam stirpem revocare volens, carnem sibi
desponsavit, ut eos, qui voluntate propria extorres facti
fuerant, Patri reconciliaret.
V.
Tu autem Domine miserere nobis.
R.
Deo gratias
R.
Hortus conclusus soror mea sponsa, hortus conclusus, fons
signatus:
* Emissiones tuae paradisus, o Maria.
V.
Aperi mihi, soror mea, amica mea, columba mea, immaculata mea.
R.
Emissiones tuae paradisus, o Maria.
V.
Jube domne benedicere.
Benedictio.
Divinum
auxilium maneat semper nobiscum. Amen.
Lectio 8
Ave Dei mons praepinguis et umbrosus, in quo enutritus agnus
rationalis peccata atque infirmitates nostras portavit: mons, e
quo devolutus ille, nulla manu praecisus lapis, contrivit aras
idolorum, et factus est in caput anguli, mirabilis in oculis
nostris, Ave sanctus Dei thronus divinum donarium, domus
gloriae, perpulchrum ornamentum, cimelium electum, et totius
orbis propitiatorium, coelumque Dei gloriam enarrans.
Ave urna ex puro auro conflata, et
suavissimam animarum nostrarum dulcedinem, Christum scilicet,
qui manna est, continens. O purissima et omni laude et obsequio
dignissima Virgo, Deo dicatum donarium omni creaturarum
conditioni praecellens, terra non secta, inaratus ager, vitis
floridissima, fons aquas effundens, virgo generans: et mater
viri nescia, innocentiae thesaurus absconditus, et sanctimoniae
decus; acceptissimis tuis ac materna auctoritate validis
precibus ad Dominum ac Deum omnium Conditorem Filium tuum ex te
sine patre genitum, ecclesiastici ordinis gubernacula fac
dirigas, et ad portum tranquillum perducas.
V.
Tu autem Domine miserere nobis.
R.
Deo gratias
R.
Magnificat anima mea Dominum:
* Quia fecit mihi magna qui potens est, et sanctum nomen ejus.
V.
Ecce enim ex hoc beatam me dicent omnes generationes.
R.
Quia fecit mihi magna qui potens est, et sanctum nomen ejus.
V.
Jube domne benedicere.
Benedictio.
Ad societatem
civium supernorum perducat nos Rex Angelorum.
Amen.
Lectio 9
Sacerdotes justitia, et probatae, immaculatae ac sincerae fidei
exsultatione splendidissime indiuto. Orthodoxis principibus, qui
prae omni purpurae aut auri splendore, et prae margaritis ac
lapidibus pretiosis, te nacti sunt diadema et indumentum ac
firmissimum regni sui ornamentum, in tranquillo ac prospero
statu sceptra dirige. Male fidas nationes in te, ac Deum ex te
genitum blasphemantes, eorum pedibus sternens subjicito:
subjectumque populum, ut secundum Dei praeceptum in suavi
obedientiae obsequio perseveret, confirmato. Tuam hanc
civitatem, quae te tamquam turrim ac fundamentum habet,
victoriae trilimphis coronato, et fortitudine circumcingens
custodito Dei habitationem, templi decorem semper conservato;
laudatores tuos ab omni discrimine et animi angore exime;
captivis redemptionem tribiuto; peregrinis tecto, et quovis
praesidio destitutis, solamen te exhibe. Universo mundo
auxiliatricem manum tuam porrige, ut in laetitia et exsultatione
solemnitates tuas simul cum ista, quam modo celebramus,
festivitate splendidissimo exitu transigamus, in Christo Jesu
universorum Rege ac vero Deo nostro, cui gloria et fortitudo una
cum sancto vitaeque principio Patre, et coaeterno et
consubstantiali et conregnante Spiritu, nunc et semper et in
saecula saeculorum. Amen.
V.
Tu autem Domine miserere nobis.
R.
Deo gratias
Te Deum
Te
Deum laudamus: te Dominum confitemur.
Te aeternum Patrem, omnis terra
veneratur.
Tibi omnes
angeli, tibi coeli et universae potestates:
Tibi cherubim et seraphim incessabili voce proclamant:
Sanctus, Sanctus, Sanctus, Dominus Deus Sabaoth.
Pleni sunt coeli et terra majestatis gloriae tuae.
Te gloriosus apostolorum chorus,
Te prophetarum laudabilis numerus,
Te martyrum candidatus laudat exercitus.
Te per orbem terrarum sancta confitetur Ecclesia,
Patrem immensae majestatis;
Venerandum tuum verum et unicum Filium;
Sanctum quoque Paraclitum Spiritum.
Tu rex gloriae, Christe.
Tu Patris sempiternus es Filius.
Tu, ad liberandum suscepturus hominem,
non horruisti Virginis uterum.
Tu, devicto mortis aculeo,
aperuisti credentibus regna coelorum.
Tu ad dexteram Dei sedes, in gloria Patris.
Judex crederis esse venturus.
Sequens versus dicitur flexis
genibus
Te ergo quaesumus, tuis famulis subveni, quos pretioso sanguine
redemisti.
Aeterna fac cum sanctis tuis in gloria numerari.
Salvum fac
populum tuum, Domine, et benedic hereditati tuae.
Et rege eos, et extolle illos usque in aeternum.
Per singulos dies benedicimus te; et laudamus nomen tuum in
saeculum, et in saeculum saeculi.
Dignare, Domine, die isto sine
peccato nos custodire.
Miserere nostri, Domine, miserere nostri.
Fiat misericordia tua, Domine, super nos,quemadmodum speravimus
in te.
In te, Domine, speravi: non confundar in aeternum.
Omit sequentibus nisi Laudes separandum est
Oratio
{ex Proprio Sanctorum}
V.
Domine exaudi orationem meam
R.
Et clamor meus ad te veniat
Oremus
Deus, qui per Immaculatam Virginis conceptionem dignum Filio tuo
habitaculum praeparasti: quaesumus; ut qui ex morte eiusdem
Filii tui praevisa, eam ab omni labe praeservasti, nos quoque
mundos ejus intercessione ad te pervenire concedas.
Per
eumdem Dominum nostrum Jesum Christum filium tuum, qui tecum
vivit et regnat in unitate Spiritus Sancti, Deus, per omnia
saecula saeculorum.
R.
Amen.
V.
Domine exaudi orationem meam
R.
Et clamor meus ad te veniat
Conclusion
V.
Benedicamus Domino
R.
Deo gratias
V.
Fidelium animae per misericordiam Dei requiescant in pace.
R.
Amen. |
