MISSALE ROMANUM

EX DECRETO  S.O. CONCILII  VATICANI II

 INSTAURATUM 

AUCTORITATE  PAULI Pp. VI PROMULGATUM

JOANNIS PAULI Pp. II CURA RECOGNITUM

MISSÆ VOTIVÆ

In base ai tempi e ai modi stabiliti dall’Ordinario, si possono Celebrare le Messe Votive specialmente fuori dalle Domeniche di Avvento, Quaresima, Settimana Santa e l’Ottava di Pasqua, tutte le Solennità e quando si celebrano le feste dei Santi Obbligatorie.

Nelle ferie del Tempo per Annum è bene per incrementare la pietà del Sacerdote e dei fedeli celebrare Messe Votive.

De Sanctissima Trinitate

De Dei Misericordia

De Domino Nostro Iesu Christo Summo Et Æterno Sacerdote

De Mysterio Sanctæ Crucis

De Sanctissimo Nomine Iesu

De Pretiosissimo Sanguine Domini Nostri Iesu Christi

De Sacratissimo Corde Iesu

De Spiritu Sancto

De beata Maria Ecclesiæ Matre

De Sanctissimo Nomine Mariæ

De sancta Maria, Regina Apostolorum

De Sancta Maria, Salus Populi Romani

De Sanctis Angelis

De s. Ioanne Baptista

De S. Ioseph

De Omnibus Sanctis Apostolis

De SS. Petro et Paulo, Apostolis

De S. Petro, Apostolo

De S. Paulo, Apostolo

De Quovis Sancto Apostolo

De Omnibus Sanctis

De Sanctissima Trinitate

Colore Liturgico BIANCO

Ant. ad introitum

Benedíctus sit Deus Pater, Unigenitúsque Dei Fílius, Sanctus quoque Spíritus, quia fecit nobíscum misericórdiam suam.

Collecta

Deus Pater, qui, Verbum veritátis et Spíritum sanctificatiónis mittens in mundum, admirábile mystérium tuum homínibus declárasti, da nobis, in confessióne veræ fídei, ætérnæ glóriam Trinitátis agnóscere, et Unitátem adoráre in poténtia maiestátis. Per Dóminum.

Super oblata

Sanctífica, quæsumus, Dómine Deus noster, per tui nóminis invocatiónem, hæc múnera nostræ servitútis, et per ea nosmetípsos tibi pérfice munus ætérnum. Per Christum.

Præfatio: Sanctissimæ Trinitatis.
 
Ant. ad communionem
Ga 4,6

Quóniam autem estis fílii, misit Deus Spíritum Fílii sui in corda vestra clamántem: Abba, Pater.

Post communionem

Profíciat nobis ad salútem córporis et ánimæ, Dómine Deus noster, huius sacraménti suscéptio, et sempitérnæ sanctæ Trinitátis eiusdémque indivíduæ Unitátis conféssio. Per Christum.

De Dei Misericordia

Colore Liturgico BIANCO

Questa Messa è detta nella II Domenica di Pasqua detta della Divina Misericordia

Ant. ad introitum

Cf. Jr 31,3; 1Jn 2,2

In caritáte perpétua diléxit nos Deus: Fílium suum Unigénitum misit propitiatiónem pro peccátis nostris, non pro nostris autem tantum, sed étiam pro totíus mundi.

Oppure:

Ps 88,2

Misericórdias Dómini in ætérnum cantábo, in generatiónem et generatiónem annuntiábo veritátem tuam in ore meo.

Collecta

Deus, cuius misericórdiæ non est númerus et bonitátis infinítus est thesáurus auge propítius fidem plebis tibi sacrátæ, ut digna omnes intellegéntia comprehéndant qua dilectióne sunt creáti, quo sánguine redémpti, quo Spíritu regeneráti. Per Dóminum.

Super oblata

Oblatiónes nostras, Dómine, cleménter assúme, eásque in redemptiónis sacraméntum convérte, mortis et resurrectiónis Fílii tui memoriále, ut huius sacrifícii virtúte, Christo iúgiter confidéntes, ad vitam perveniámus ætérnam. Per Christum.

Præfatio: Paschalis.

Ant. ad communionem

Ps 102,17

Misericórdia Dómini ab ætérno et usque in ætérnum super timéntes eum.

Oppure:

Jn 19,34

Unus mílitum láncea latus eius apéruit et contínuo exívit sanguis et aqua.

Post communionem

Concéde nobis, miséricors Deus, ut Córpore et Sánguine Fílii tui enutríti fiduciáliter e misericórdiæ fóntibus hauriámus et in fratres magis magísque misericórdes nosmetípsos præbeámus. Per Christum.
 
 

De Domino Nostro Iesu Christo Summo Et Æterno Sacerdote

Colore Liturgico BIANCO

Ant. ad introitum

Ps 109,4

Iurávit Dóminus et non pænitébit eum: Tu es sacérdos in ætérnum secúndum órdinem Melchísedech.

Collecta

Deus, qui ad glóriam tuam et géneris humáni salútem Christum voluísti summum æternúmque constitúere sacerdótem, præsta, ut pópulus, quem sánguine suo tibi acquisívit, ex eius memoriális participatióne, virtútem crucis ipsíus cápiat et resurrectiónis. Qui tecum.

Super oblata

Concéde nobis, quæsumus, Dómine, hæc digne frequentáre mystéria, quia, quóties huius hóstiæ commemorátio celebrátur, opus nostræ redemptiónis exercétur. Per Christum.

Præfatio: de SS.ma Eucharistia.

Ant. ad communionem

1Co 11,24-25

Hoc Corpus, quod pro vobis tradétur; hic calix novi testaménti est in meo Sánguine, dicit Dóminus. Hoc fácite quotiescúmque súmitis, in meam commemoratiónem.

Post communionem

Quæsumus, Dómine, ut, huius participatióne sacrifícii, quod in sui commemoratiónem Fílius tuus præcépit offérri, nosmetípsos cum illo oblatiónem fácias tibi sempitérnam. Qui vivit et regnat in sæcula sæculórum.

De Mysterio Sanctæ Crucis

Colore Liturgico ROSSO

Ant. ad introitum

Cf. Ga 6,14

Nos autem gloriári opórtet in cruce Dómini nostri Iesu Christi, in quo est salus, vita et resurréctio nostra, per quem salváti et liberáti sumus.

Collecta

Deus, qui Unigénitum tuum crucem subíre voluísti, ut salvum fáceret genus humánum, præsta, quæsumus, ut, cuius mystérium in terra cognóvimus, eius redemptiónis præmia in cælo cónsequi mereámur. Per Dóminum.

Super oblata

Hæc oblátio, Dómine, quæsumus, ab ómnibus nos purget offénsis, quæ in ara crucis totíus mundi tulit offénsam. Per Christum.
 

Præfatio: De Mysterio Sanctæ Crucis.

Ant. ad communionem

Jn 12,32

Ego si exaltátus fúero a terra, omnes traham ad meípsum, dicit Dóminus.

Post communionem

Refectióne tua sancta enutríti, Dómine Iesu Christe, súpplices deprecámur, ut, quos per lignum crucis vivíficæ redemísti, ad resurrectiónis glóriam perdúcas. Qui vivis et regnas in sæcula sæculórum.

De Sanctissima Eucharistia

Colore Liturgico BIANCO

Ant. ad introitum

Ps 77,23-25

Iánuas cæli apéruit Dóminus, et pluit illis manna ad manducándum, et panem cæli dedit eis: panem angelórum manducávit homo.

Collecta

Deus, qui humánæ redemptiónis opus per Unigéniti tui paschále mystérium implevísti, concéde propítius, ut, qui Christi mortem et resurrectiónem in sacramentórum signis annuntiámus fidénter, salvatiónis tuæ contínuum experiámur augméntum. Per Dóminum.

Super oblata

Salútis nostræ memoriále celebrántes, cleméntiam tuam, Dómine, supplíciter exorámus, ut hoc sacraméntum pietátis fiat nobis signum unitátis et vínculum caritátis. Per Christum.

Præfatio: de SS.ma Eucharistia.

Ant. ad communionem

Jn 6,51-52

Ego sum panis vivus, qui de cælo descéndi, dicit Dóminus. Si quis manducáverit ex hoc pane, vivet in ætérnum; et panis, quem ego dabo, caro mea est pro mundi vita.

Post communionem

Sanctíficet nos, quæsumus, Dómine, mensæ cæléstis participátio, ut, per Corpus et Sánguinem Christi, fratérnitas cuncta copulétur. Per Christum.

De Sanctissimo Nomine Iesu

Colore Liturgico BIANCO

Ant. ad introitum

Ph 2,10-11

In nómine Iesu omne genu flectátur, cæléstium, terréstrium et infernórum; et omnis lingua confiteátur quia Dóminus Iesus Christus in glória est Dei Patris.

Collecta

Sanctíssimum Iesu nomen venerántibus, nobis, Dómine, concéde propítius, ut, eius in hac vita dulcédine perfruéntes, sempitérno gáudio in pátria repleámur. Per Dóminum.

Super oblata

In eius nómine, Pater omnípotens, múnera nostra dignáre suscípere, in quo quidquid petiérimus nos certe consecutúros esse confídimus, ipso Fílio tuo benigníssime pollicénte. Qui vivit et regnat in sæcula sæculórum.

Ant. ad communionem

Ac 4,12

Non est áliud nomen sub cælo datum homínibus, in quo opórteat nos salvos fíeri.

Post communionem

Tua nobis, quæsumus, Dómine, miseratióne concéde, ut in his sacris mystériis Dóminum Iesum dignis obséquiis venerémur, in cuius nómine voluísti omne genu flecti, omnésque hómines inveníre salútem. Per Christum.

De Pretiosissimo Sanguine Domini
Nostri Iesu Christi

Colore Liturgico ROSSO

Ant. ad introitum

Cf. Ap 5,9-10

Redemísti nos, Dómine, in Sánguine tuo, ex omni tribu et lingua et pópulo et natióne, et fecísti nos Deo nostro regnum.

Collecta

Deus, qui pretióso Unigéniti tui Sánguine univérsos hómines redemísti, consérva in nobis opus misericórdiæ tuæ, ut, nostræ salútis mystérium iúgiter recoléntes, eiúsdem fructum cónsequi mereámur. Per Dóminum.

Super oblata

Maiestáti tuæ, Dómine, oblatiónis nostræ múnera proferéntes, ad novi testaménti Mediatórem Iesum his mystériis accedámus, eiúsque aspersiónem Sánguinis salutíferam innovémus. Qui vivit et regnat in sæcula sæculórum.

Præfatio: I de Passione Domini.

Ant. ad communionem

Cf. 1Co 10,16

Calix benedictiónis, cui benedícimus, communicátio Sánguinis Christi est; et panis, quem frángimus, participátio Córporis Dómini est.

Post communionem

Cibo refécti, Dómine, potúque salútis, Salvatóris nostri, quæsumus, semper Sánguine perfundámur, qui fons aquæ nobis fiat in vitam saliéntis ætérnam. Per Christum.

Oppure:

Refécti cibo potúque cælésti, quæsumus, omnípotens Deus, ut ab hóstium deféndas formídine, quos pretióso Fílii tui Sánguine redemísti. Qui vivit et regnat in sæcula sæculórum.

De Sacratissimo Corde Iesu

Colore Liturgico BIANCO

Ant. ad introitum

Ps 32,11 Ps 19

Cogitatiónes Cordis eius in generatióne et generatiónem, ut éruat a morte ánimas eórum et alat eos in fame.

Collecta

Fac nos, Dómine Deus, Cordis Fílii tui virtútibus índui et afféctibus inflammári, ut, eius imágini confórmes effécti, ætérnæ redemptiónis mereámur esse partícipes. Per Dóminum.

Super oblata

Deus, Pater misericordiárum, qui propter nímiam caritátem, qua dilexísti nos, Unigénitum tuum nobis ineffábili bonitáte donásti, præsta, quæsumus, ut, cum ipso in unum consummáti, dignum tibi offerámus obséquium. Per Christum.

Præfatio: De Sacratissimo Corde Iesu.

Ant. ad communionem

Jn 7,37-38

Dicit Dóminus: Si quis sitit, véniat ad me et bibat. Qui credit in me, flúmina de ventre eius fluent aquæ vivæ.

Oppure:

Jn 19,34

Unus mílitum láncea latus eius apéruit, et contínuo exívit sanguis et aqua.

Post communionem

Tui sacraménti caritátis partícipes effécti, cleméntiam tuam, Dómine, supplíciter implorámus, ut Christo conformémur in terris, et eius glóriæ consórtes fíeri mereámur in cælis. Qui vivit et regnat in sæcula sæculórum.

De Spiritu Sancto

Colore Liturgico ROSSO

A

Ant. ad introitum

Rm 5,5

Cáritas Dei diffúsa est in córdibus nostris, per inhabitántem Spíritum eius in nobis.

Collecta

Deus, qui corda fidélium Sancti Spíritus illustratióne docuísti, da nobis in eódem Spíritu recta sápere, et de eius semper consolatióne gaudére. Per Dóminum.

Super oblata

Múnera, quæsumus, Dómine, obláta sanctífica, et corda nostra Sancti Spíritus illustratióne emúnda. Per Christum.

Præfatio: I de Spiritu Sancto: De missione Spiritus a Domino in Ecclesiam.

Ant. ad communionem

Cf. Ps 67,29-30

Confírma hoc, Deus, quod operátus es in nobis, a templo sancto tuo, quod est in Ierúsalem.

Post communionem

Sancti Spíritus, Dómine, corda nostra mundet infúsio, et sui roris íntima aspersióne fecúndet. Per Christum.

B

Ant. ad introitum

Cf. Jn 14,26 Jn 15,26

Cum vénerit Spíritus veritátis, docébit vos omnem veritátem, dicit Dóminus.

Collecta

Mentes nostras, quæsumus, Dómine, Paráclitus qui a te procédit illúminet, et indúcat in omnem, sicut tuus promísit Fílius, veritátem. Qui tecum.

Oppure:

Deus, cui omne cor patet et omnis volúntas lóquitur, et quem nullum latet secrétum, purífica per infusiónem Spíritus Sancti cogitatiónes cordis nostri, ut te perfécte dilígere, et digne laudáre mereámur. Per Dóminum.

Super oblata

Inténde, quæsumus, Dómine, spiritálem hóstiam altáribus tuis piæ devotiónis stúdio propósitam, et da fámulis tuis spíritum rectum, ut fides eórum hæc dona tibi concíliet, et comméndet humílitas. Per Christum.

Præfatio: II de Spiritu Sancto.

Ant. ad communionem

Jn 15,26 Jn 16,14

Spíritus qui a Patre procédit, ille me clarificábit, dicit Dóminus.

Post communionem

Dómine Deus noster, qui nos vegetáre dignátus es cæléstibus aliméntis, suavitátem Spíritus tui penetrálibus nostri cordis infúnde, ut, quæ temporáli devotióne percépimus, sempitérno múnere capiámus. Per Christum.

C

Ant. ad introitum

Lc 4,18

Spíritus Dómini super me, evangelizáre paupéribus misit me, dicit Dóminus.

Collecta

Deus, qui univérsam Ecclésiam tuam in omni gente et natióne sanctíficas, in totam mundi latitúdinem Spíritus tui dona defúnde, ut, quod in ipsis evangélicæ prædicatiónis exórdiis tua est operáta dignátio, nunc quoque per credéntium corda diffúndat. Per Dóminum.

Oppure:

Deus, cuius Spíritu régimur, cuius protectióne servámur, præténde nobis misericórdiam tuam, et exorábilis tuis esto supplícibus, ut in te credéntium fides tuis semper benefíciis adiuvétur. Per Dóminum.

Super oblata

Sacrifícia, Dómine, tuis obláta conspéctibus, ignis Spíritus sanctíficet, qui discipulórum Fílii tui corda succéndit. Qui vivit et regnat in sæcula sæculórum.

Præfatio: I de Spiritu Sancto vel II.

Ant. ad communionem

Cf. Ps 103,30

Emítte Spíritum tuum, et creabúntur, et renovábis fáciem terræ.

Post communionem

Hæc nobis, Dómine, múnera sumpta profíciant, ut illo iúgiter Spíritu ferveámus, quem Apóstolis tuis ineffabíliter infudísti. Per Christum.

De beata Maria Ecclesiæ Matre

Colore Liturgico BIANCO

Ant. ad introitum

Cf. Ac 1,14

Erant discípuli perseverántes unanímiter in oratióne cum María, matre Iesu.

Collecta

Deus, misericordiárum Pater, cuius Unigénitus, cruci affíxus, beátam Maríam Vírginem, Genetrícem suam, Matrem quoque nostram constítuit, concéde, quæsumus, ut, eius cooperánte caritáte, Ecclésia tua, in dies fecúndior, prolis sanctitáte exsúltet et in grémium suum cunctas áttrahat famílias populórum. Per Dóminum.

Super oblata

Súscipe, Dómine, oblatiónes nostras et in mystérium salútis convérte, cuius virtúte et caritáte Vírginis Maríæ, Ecclésiæ Matris, inflammémur et óperi redemptiónis cum ea árctius sociári mereámur. Per Christum.

Præfatio: III De Beata Maria Virgine.

Ant. ad communionem

Cf. Jn 2,1 Jn 11

Núptiæ factæ sunt in Cana Galilææ, et erat mater Iesu ibi; tunc fecit inítium signórum Iesus et manifestávit glóriam suam, et credidérunt in eum discípuli eius.

Oppure:

Cf. Jn 19,26-27

Ex cruce pendens dixit Iesus discípulo, quem diligébat: Ecce mater tua.

Post communionem

Sumpto, Dómine, pígnore redemptiónis et vitæ, súpplices adprecámur, ut Ecclésia tua, matérna Vírginis ope, et Evangélii præcónio univérsas gentes erúdiat et Spíritus effusióne orbem terrárum adímpleat. Per Christum.

De Sanctissimo Nomine Mariæ

Ant. ad introitum

Cf. Benedícta es tu, Virgo María, a Dómino Deo excélso præ ómnibus muliéribus super terram; quia nomen tuum ita magnificávit, ut non recédat laus tua de ore hóminum.

Collecta

Deus, qui beátam Vírginem Maríam, grátia tua plenam, inter mulíeres elegísti, ut Fílii tui, Redemptóris nostri, fíeret Mater; concéde nobis, qui sanctum nomen eius venerámur, præséntis témporis perícula declináre, et vitam cum ipsa cónsequi ætérnam. Per Dóminum.

Oppure:

Deus, cuius Fílius in ara crucis exspírans beatíssimam Vírginem Maríam Matrem vóluit esse nostram, quam suam elégerat, concéde propítius, ut, qui sub eius præsídium secúre confúgimus, matérno invocáto nómine confortémur. Per Dóminum.

Super oblata

Munéribus, Dómine, oblátis inténde, ut corda nostra, Sancti Spíritus illustratióne perfúsa, beáta María semper Vírgine intercedénte, Christo Fílio tuo iúgiter stúdeant adhærére. Qui vivit et regnat in sæcula sæculórum.

Ant. ad communionem

Cf. Lc 1,26-27

Missus est ángelus Gábriel a Deo ad vírginem, et nomen vírginis María.

Post communionem

Tríbue nobis, quæsumus, Dómine, quos ad verbi et sacraménti mensam roborásti, ut, beátæ Maríæ ductu et patrocínio, et illa respuámus, quæ christiáno inimíca sunt nómini et ea, quæ sunt apta, sectémur. Per Christum.

De sancta Maria, Regina Apostolorum

Ant. ad introitum

Cf. Ac 1,14

Erant discípuli perseverántes unanímiter in oratióne cum María matre Iesu.

Collecta

Deus, qui Apóstolis tuis, cum María Matre Iesu orántibus, Sanctum dedísti Spíritum, da nobis, ut, ipsa intercedénte, maiestáti tuæ fidéliter servíre et nóminis tui glóriam verbo et exémplo diffúndere valeámus. Per Dóminum.

Super oblata

Tua, Dómine, propitiatióne, et beátæ Maríæ semper Vírginis intercessióne hæc nostra obtíneat oblátio, ut Ecclésia tua fidélium número créscat, et iúgiter fúlgeat ubertáte virtútum. Per Christum.

Præfatio: I de beata Maria Virgine vel II.

Ant. ad communionem

Cf. Lc 11,27-28 Beátus venter qui portávit Christum Dóminum; quinímmo beáti qui áudiunt verbum Dei, et custódiunt illud.

Post communionem

Súmptis, Domine, salútis nostræ subsídiis in memória beátæ Maríæ Vírginis, Apostolórum regínæ, te súpplices, deprecámur, ut in tua voluntáte et in hóminum servítio persevérans, pópulus tuus semper profíciat ad salútem. Per Christum.

De Sancta Maria, Salus Populi Romani

Colore Liturgico BIANCO

 
Ant. Ad introitum
Salve, Regina misericórdiæ, Mater Dei gloriósa, Salus pópuli Romàni, salve.

Collecta
Deus, qui Genetricem dilécti Filii tui salútem pópuli Románi constituisti, præsta, quǽsumus, ut nos in eius protectióne vivámus et Ecclésia tua perpetua pace lætétur. Per Dóminum.

Super Oblata

Laudis tibi, Domine, hóstias offérimus, de Genetricis Filii tui memòria lætántes; et concéde, ut tantæ Matris auxilio, te in omnibus adversitátibus subveniéntem sentiámus.Per Christum.

Ant. ad Communionem
Beáta es, Virgo María: per te Deus nobis dedit mundi Salvatórem.

Post Communionem

Sumptis, Domine, sacraméntis redemptiónis et vitæ, sùpplices deprecàmur, ut, intercedente beata Virgine María, quam nobis piissiman Matrem misericórditer dedisti, humanæ salútis mystério deserviamus impénsius atque in regna cælórum mereámur admitti.

De Sanctis Angelis

Colore Liturgico BIANCO

Ant. ad introitum

Cf. Ps 102,20

Benedícite Dóminum, omnes Angeli eius; poténtes virtúte, qui fácitis verbum eius, ad audiéndam vocem sermónum eius.

Collecta

Deus, qui miro órdine Angelórum ministéria hominúmque dispénsas, concéde propítius, ut, a quibus tibi ministrántibus in cælo semper assístitur, ab his in terra vita nostra muniátur. Per Dóminum.

Super oblata

Hóstias tibi, Dómine, laudis offérimus, supplíciter deprecántes, ut eásdem, angélico ministério in conspéctum tuæ maiestátis delátas, et placátus accípias, et ad salútem nostram proveníre concédas. Per Christum.

Præfatio: De Angelis.

Ant. ad communionem

Ps 137,1

In conspéctu Angelórum psallam tibi, Deus meus.

Post communionem

Pane cælésti refécti, súpplices te, Dómine, deprecámur, ut, eius fortitúdine roboráti, sub Angelórum fidéli custódia, fortes, salútis progrediámur in via. Per Christum.

Si può recitare la Messa dei Santi Angeli Custodi, 2 Ottobre.

De s. Ioanne Baptista

Colore Liturgico BIANCO

Ant. ad introitum

Lc 1,14-15

Hic erit magnus coram Dómino, et Spíritu Sancto replébitur adhuc ex útero matris suæ, et multi in nativitáte eius gaudébunt.

Collecta

Præsta, quæsumus, omnípotens Deus, ut família tua per viam salútis incédat, et, beáti Ioánnis Præcursóris hortaménta sectándo, ad eum quem prædíxit, secúra pervéniat, Dóminum nostrum Iesum Christum. Qui tecum.

Super oblata

Múnera pópuli tui, Dómine, propítius inténde, in beáti Ioánnis Baptístæ commemoratióne deláta, et præsta, ut, quæ mystério gérimus, débitæ servitútis actióne sectémur. Per Christum.

Præfatio: De S. Ioanne Baptista.

Ant. ad communionem

Lc 1,68

Benedíctus Dóminus Deus Isræl, quia visitávit et fecit redemptiónem plebis suæ.

Post communionem

Sacris dápibus satiátos, beáti Ioánnis Baptístæ nos, Dómine, præclára comitétur orátio, et, quem Agnum nostra ablatúrum crímina nuntiávit, ipsum Fílium tuum poscat nobis fore placátum. Qui vivit et regnat in sæcula sæculórum.

De Sancti Ioseph

Colore Liturgico BIANCO

Ant. ad introitum

Lc 12,42

Ecce fidélis servus et prudens, quem constítuit Dóminus super famíliam suam.

Collecta

Deus, qui ineffábili providéntia beátum Ioseph sanctíssimæ Genetrícis Fílii tui sponsum elígere dignátus es, præsta, quæsumus, ut, quem protectórem venerámur in terris, intercessórem habére mereámur in cælis. Per Dóminum.

Super oblata

Laudis hóstiam immolatúri, Pater sancte, supplíciter postulámus, ut in ministério nostro beáti Ioseph précibus foveámur, cui dedísti Unigénitum tuum vice in terris custodíre patérna. Qui vivit et regnat in sæcula sæculórum.

Præfatio:  De Sancti Ioseph.

Ant. ad communionem

Mt 25,21

Euge, serve bone et fidélis: intra in gáudium Dómini tui.

Post communionem

His recreáti, Dómine, vivíficis sacraméntis, in iustítia tibi semper et sanctitáte vivámus, beáti Ioseph exémplo et intercessióne, qui magnis tuis perficiéndis mystériis vir iustus et obo´ diens ministrávit. Per Christum.

Si può dire anche la Messa del 19 Marzo e quella del 1 Maggio.

De Omnibus Sanctis Apostolis

Colore Liturgico ROSSO

Ant. ad introitum

Jn 15,16

Non vos me elegístis, sed ego elégi vos, ut eátis et fructum afferátis, et fructus vester máneat, dicit Dóminus.

Collecta

Beatórum Apostolórum honóre contínuo Ecclésia tua, Dómine, semper exsúltet, ut his præsúlibus gubernétur, quorum doctrína gaudet et méritis. Per Dóminum.

Super oblata

Effúnde in nos, Dómine, quem in Apóstolos effudísti abúnde, Spíritum Sanctum tuum, ut cognoscámus ea, quæ per eos nobis donásti, et sacrifícium laudis ad glóriam tuam rite offerámus. Per Christum.

Præfatio: De Apostolis.

Ant. ad communionem

Mt 19,28

Vos, qui secúti estis me, sedébitis super sedes, iudicántes duódecim tribus Isræl, dicit Dóminus.

Post communionem

Fac nos, Deus, cum exsultatióne et simplicitáte cordis perseveráre in doctrína Apostolórum, in fractióne panis communicántes et oratiónibus. Per Christum.

De SS. Petro et Paulo, Apostolis

Colore Liturgico ROSSO

Ant. ad introitum

Petrus apóstolus et Paulus doctor géntium, ipsi nos docuérunt legem tuam, Dómine.

Collecta

Da nobis, quæsumus, Dómine Deus noster, beatórum apostolórum Petri et Pauli intercessiónibus sublevári, ut per quos Ecclésiæ tuæ supérni múneris rudiménta donásti, per eos subsídia perpétuæ salútis impéndas. Per Dóminum.

Super oblata

Múnera, Dómine, tuis altáribus adhibémus, de beatórum apostolórum Petri et Pauli commemoratióne gloriántes, ut quantum sumus de nostro mérito formidántes, tantum de tua benignitáte gloriémur salvándi. Per Christum.

Præfatio: de ss. Petro et Paulo, Apostolis.

Ant. ad communionem

Cf. Jn 21,15 Jn 17

Simon Ioánnis, díligis me plus his? Dómine, tu ómnia nosti, tu scis, Dómine, quia amo te.

Post communionem

Cæléstibus sacraméntis, quæsumus, Dómine, fidéles tuos corróbora, quos Apostolórum doctrína illuminásti. Per Christum.

De S. Petro, Apostolo

Colore Liturgico ROSSO

Ant. ad introitum

Lc 22,32

Dicit Dóminus Simóni Petro: Ego rogávi pro te, ut non defíciat fides tua, et tu aliquándo convérsus, confírma fratres tuos.

Collecta

Deus, qui beáto Petro apóstolo tuo, collátis clávibus regni cæléstis, ligándi atque solvéndi pontifícium tradidísti, concéde, ut, intercessiónis eius auxílio, a peccatórum nostrórum néxibus liberémur. Per Dóminum.

Super oblata

Oblatiónem pópuli tui, quæsumus, Dómine, súscipe propítius in commemoratióne beáti Petri apóstoli, quem ad confiténdum te Deum vivum tuúmque Fílium secréta revelatióne docuísti, et gloriósa fecísti passióne Magístro suo testimónium perhibére. Per Christum.

Præfatio: I de Apostolis.

Ant. ad communionem

Mt 16,16 Mt 18

Dixit Petrus ad Iesum: Tu es Christus, Fílius Dei vivi. Respóndit Iesus: Tu es Petrus, et super hanc petram ædificábo Ecclésiam meam.

Post communionem

Ad convívium, Dómine, salútis admíssi, beáti Petri apóstoli memóriam venerántes, gratánter expóscimus, ut Fílio tuo, qui solus verba vitæ habet, iúgiter hæreámus, quátenus oves gregis tui fidéles ad páscua felíciter deducámur ætérna. Per Christum.

De S. Paulo, Apostolo

Colore Liturgico ROSSO

Ant. ad introitum

2Tm 1,12 2Tm 4,8

Scio cui crédidi, et certus sum quia potens est depósitum meum serváre in illum diem iustus iudex.

Collecta

Dómine Deus, qui beátum Paulum apóstolum ad prædicándum Evangélium mirabíliter designásti, da fide mundum univérsum ímbui, quam ipse coram régibus gentibúsque portávit, ut iúgiter Ecclésia tua cápiat augméntum. Per Dóminum.

Super oblata

Illo nos, quæsumus, Dómine, divína tractántes, fídei lúmine Spíritus perfúndat, quo beátum Paulum apóstolum ad glóriæ tuæ propagatiónem collustrávit. Per Christum.

Præfatio: I de Apostolis.

Ant. ad communionem

Ga 2,20

In fide vivo Fílii Dei, qui diléxit me, et trádidit semetípsum pro me.

Post communionem

Córporis et Sánguinis Fílii tui, Dómine, communióne reféctis, concéde, ut ipse Christus sit nobis vívere, nihílque ab eius nos séparet caritáte, et, beáto monénte Apóstolo, in dilectióne cum frátribus ambulémus. Per Christum.

De Quovis Sancto Apostolo

Colore Liturgico ROSSO

Ant. ad introitum

Ps 95,2-3

Annuntiáte de die in diem salutáre Dei, annuntiáte inter gentes glóriam eius.

Collecta

Róbora in nobis, Dómine, fidem, qua Fílio tuo beátus N. apóstolus sincéro ánimo adhæsit, et præsta, ut, ipso deprecánte, Ecclésia tua cunctis géntibus salútis fiat sacraméntum. Per Dóminum.

Super oblata

Beáti N. apóstoli commemoratióne tibi múnera deferéntes, quæsumus, Dómine, ut, eius exémplo, digne Evangélio Christi conversántes, fídei evangélicæ collaborémus. Per Christum.

Præfatio: II de Apostolis.

Ant. ad communionem

Lc 22,29-30

Ego dispóno vobis, sicut dispósuit mihi Pater meus, regnum, ut edátis et bibátis super mensam meam in regno meo, dicit Dóminus.

Post communionem

Súmpsimus, Dómine, pignus salútis ætérnæ, memóriam beáti N. apóstoli celebrántes, quod sit nobis, quæsumus, vitæ præséntis auxílium páriter et futúræ. Per Christum.

De Omnibus Sanctis

Colore Liturgico BIANCO

Ant. ad introitum

Gaudent in cælis ánimæ Sanctórum, qui Christi vestígia sunt secúti: ídeo cum Christo exsúltant sine fine.

Collecta

Deus, omnis fons sanctitátis, fac nos in nostra unumquémque vocatióne digne ambuláre, intercedéntibus Sanctis tuis, quibus divisiónes gratiárum in terra et unam in cælo mercédem gloriósam contulísti. Per Dóminum.

Super oblata

Grata tibi sint, Dómine, múnera, quæ pro cunctórum offérimus honóre Sanctórum, et concéde, ut, quos iam crédimus de sua immortalitáte secúros, sentiámus de nostra salúte sollícitos. Per Christum.

Præfatio: I vel II de Sanctis.

Ant. ad communionem

Mt 5,8-10

Beáti mundo corde, quóniam ipsi Deum vidébunt; beáti pacífici, quóniam fílii Dei vocabúntur; beáti qui persecutiónem patiúntur propter iustítiam, quóniam ipsórum est regnum cælórum.

Post communionem

Deus, qui nos uno pane réficis et una spe susténtas, tua nos páriter grátia corróbora, ut omnes, cum Sanctis tuis unum in Christo corpus et unus spíritus, ad glóriam cum ipso resurgámus. Qui vivit et regnat in sæcula sæculórum.